د لاسرسي لېنکونه

د روسیې ولسمشر ولادمیر پوتین وایي، مسکو چمتو دی چې د تیلو د بیې د لوړېدو لپاره د تیلو د تولیدونکي او صادرونکي سازمان اوپېک له هڅو د ملاتړ په ترڅ کې د تیلو د تولید اندازه کمه کړي.

د پوتین له دې څرګندونو سره د تیلو بیه د روان کال تر ټولو لوړې کچې ته وخته.

پوتین د ترکیې په استانبول کې د انرژۍ نړیوالې غونډې ته د دوشنبې په ورځ وویل، زموږ په باور د انرژۍ په سکتور کې د ثبات او په مارکیټ کې د یوه تعادل د رامنځه کېدو لپاره یوازینې غوره لاره دا ده چې د تیلو تولید کم یا ورو شي.

هغه وویل، روسیه چمتو ده چې له هغو ګډو اقداماتو سره یوځای شي چې د تیلو تولید محدودي او د تیلو له نورو صادرونکو هېوادونو هم غواړي ورته اقدام وکړي.

پوتین وویل، د تیلو ټیټه بیه د دې سبب شوې چې له ۲۰۱۴میلادي کال راهیسې د تیلو په سکتور کې پانګونه نېږدې پنځه سوه میلیارډ ډالره کمه شي او مارکیټ له سخت رکود سره چې په ۴۵ کلونو کې یې ساری نه‎دی لیدل شوی، مخامخ شي.

روسیه او نورهېوادونه چې اقتصاد یې پرتیلو متکي دی، له هغه وخت راهیسې چې د یوه بیرل تیلو بیه له څه باندې سلو ډالرو نه نیمایي ته راښکته شوه، اقتصادونه یې له سخت رکود سره مخامخ شوي.

XS
SM
MD
LG