روسي چارواکو ګواښ کړی چې که امریکایي الوتکې پر سوریې برید وکړي، روسیه ښایي هغه راوغورځوي.
دا ګواښ د روسیې د دفاع وزارت د ویاند له خوا خپور شوی دی.
د روسیې د دفاع وزارت ویاند «ایګور کواشینکوف» ګواښ کوي چې که د امریکا تر مشرۍ لاندې ائیتلاف الوتکې د سوریې د حکومت پر ځواکونو برید وکړي، د روسیې د دافع هوا سیستم ښایي هغوی راوغورځوي.
"زه غواړم د امریکا د ستراتیژۍ طراحانو ته یادونه وکړم چې په سوریه کې د حمیمیم او تارتوس قرارګاوې د «S »300 او «S 400»په دافع هوا سیسټم سمبالې دي او د دغه پوښښ وړانګې ښايي هغو الوتکو ته چې په دې سیمه الوتنې کوي د حیرانتیا وړ وګرځي، دوی باید پوه شي چې د دغو دافع هوا سیستمونو روسي مسؤلین ښايي د دې وخت ونه لري؛ د هر راکټ د خوځېدو د لوري په باب د امریکا او روسیې تر منځ د مستقیمې کرښې له لارې د معلوماتو غوښتنه وکړي."
دې روسي جنرال زیاته کړه؛ دی امریکا ته سپارښتنه کوي چې خپل د دې پلان عواقب ژور وڅېړي.
دا تر ټولو جدی او روښانه ګواښ دی چې تر اوسه د روسیې د یوه پوځي چارواکي لخوا د سوریې په جګړه کې خپور شوی دی.
دا ګواښ په داسې وخت کې خپرېږی چې د امریکا او روسیې تر منځ اړیکې سړې شوي دي.
د تېرې اوونۍ له وروستیو نه تر اوسه روسیې په سوریه کې «S 300» راکټونه ځای په ځای کړي او دری الوتکې وړونکې سترې بېړۍ یې د مدیترانې سمندر ته استولي دي.
په هغو روسي الوتکو کې چې د سوریې په غاړو کې درول شوي څو لیرې واټن ویشتونکي «S 400» راکټونه هم ځای په ځای شوي دي.
د واشنګتن پست ورځپاڼې د اکتوبر په څلورمه نېټه ولیکل چې د امریکا د دفاع وزارت پر حلب تر برید وروسته د سوریې د حکومت پر ځواکونو د احتمالي برید د څو طرحو وړاندیزونه د جمهور رئیس اوباما ادارې ته کړي دي.
امریکا په دې اړه پریکړه هغه وخت وکړه چې د روسیې او سوریې جنګي الوتکو د حلب په ښار برید وکړ او په سلګونو ملکی کسان یې ووژل.
متحده ایالتونو د تېرې اوونۍ په سر کې اعلان وکړ چې د سوریې په باب له روسیې سره د همکارۍ خبرې دروي، هغه خبرې چې موخه یې په سوریه کې اوربند وو.
په واشنګتن کې د امریکا د بهرنیو چارو وزارت ویاند جان کربي د روسیې د دفاع وزارت د ویاند په وینا نیوکه وکړه او ویې ویل؛ دا خبرې د یوه ډیپلوماټیک حل په لوري د خوځښت لپاره مناسبې نه دي.
خو ده زیاته کړه چې روسیه باید یوازې د خپل ځان په استازیتوب وغږېږي او امریکا د سوریې په بحران کې مختلف امکانات په نظر کې لري چې ټول یې د حل د دډیپلوماټیکو لارو پر شا اوخوا څرخي.