په سعودي عربستان کې افغان سفیر وايي چې دغه هېواد چمتو دی څو له افغان دولت سره د سولې په پروسه کې مرسته وکړي.
افغان سفیر سید جلال کریم د چهارشنبې په ورځ له آزادي راډيو سره په ځانګړې مرکه کې وویل، سعودي چارواکو ورته ژمنه کړې څو له مخالفینو سره د افغان دولت د سولې د خبرو کوربه توب او په دې برخه کې هر اړخیزې همکارۍ وکړي.
ښاغلي کریم همدا راز وویل، د هغو شاوخوا ۵۰ زرو افغانانو د ستونزو د هواري لپاره هم کار کوي چې په پاکستاني پاسپورټونو باندې په عربستان کې کار کوي.
صفي الله ستانکزي له ښاغلي کریم سره مرکه کړې او د سولې په خبرو سربېره یې د سعودي د نورو همکاریو او اړیکو په اړه هم پوښتنې مطرح کړي دي.