د لاسرسي لېنکونه

کندز کې د پامیر شلمې فرقې چارواکي وايي چې له یوې اوونۍ راهیسې د کندز دشت ارچي ولسوالۍ کې د وسله‎والو طالبانو پر وړاندې د افغان ځواکونو د «۱۶ تندر» په نوم تصفیوي عملیات دوام لري او د دې عملیاتو په پایله کې ۸۵ تنه وسله‎وال طالبان وژل شوي، ۶۱ تنه‌یې ټپیان شوي او د ۷ تنه طالبانو په شمول ۴۵ شکمن کسان ژوندي نیول شوي دي.

نوموړي ولایت کې د پامیر د شلمې فرقې قوماندان تورن جنرال محمد اکرم سامح ازادي راډیو ته وویل چې په عملیاتو کې د شپږ کلیو په شمول لکه قرلُقو، چیچکه، نو آباد او پُل سیف‌الدین سیمې د طالبانو له وجوده تصفیه شوې دي.

د پامیر د شلمې فرقې قوماندان تورن جنرال محمد اکرم سامح

د پامیر د شلمې فرقې قوماندان تورن جنرال محمد اکرم سامح

ښاغلي سامح زیاته کړه:

"دښمن له ماتې سره مخ شوی او جسدونه‌‎یې د جګړې په ډګر کې پاتې او د افغان ګډ ځواکونه د پُل مومن او شهروان په لور پرمخ روان دي."

نوموړی زیاتوي چې په دې عملیاتو کې ۱۶ حلقې د سړک د غاړې مایونونه هم د ملي اردو ځواکونو له‎خوا کشف او شنډ شول.

هغه وايي چې دغو عملیاتو کې د افغان ځواکونو یو تن سرتېرې وژل شوی او درې تنه‌یې هم ټپیان شوي دي.

په ورته وخت کې د ملي اردو د کوماند فرقې د لومړۍ لوا قوماندان جنرال امان‌الله مُبین بیا وايي چې دوی د کندز په یو شمېر سیمو کې همدارنګه په دشت ارچي ولسوالۍ کې وسله‎والو طالبانو ته درنه مرګ ژوبله اړولې ده.

د کماند فرقې د لومړۍ لوا قوماندان جنرال امان الله مُبین

د کماند فرقې د لومړۍ لوا قوماندان جنرال امان الله مُبین

ښاغلی مُبین په دې اړه وايي:

"موږ د قرلُقو او د نو آبادو سیمې د طالبانو له وجوده تصفیه کړي او عملیات د پُل مومن په لور جریان لري او د ولسوالۍ شمال لوري څخه هم زموږ تعرضونه دوام لري."

په همدې حال کې د ملي اردو د ځانګړي ځواکونو قطعې قوماندان جنرال جلال یفتلي، د کندز خلکو ته ډاډ ورکوي چې ډېر ژر به د دې ولایت ټولې سیمې د طالبانو له شتونه تصفیه کړي.

د ملي اردو د ځانګړي ځواکونو د قطعې قوماندان جنرال جلال یفتلي

د ملي اردو د ځانګړي ځواکونو د قطعې قوماندان جنرال جلال یفتلي

ښاغلی یفتلي زیاتوي:

"موږ د کندز خلکو سره همدارنګه د دشت ارچي ولسوالۍ بې‌ځایه شویو خلکو سره ژمنې کړې وې چې موږ ستاسو سیمې تصفیه کوو او موږ عملاً د دشت ارچي ولسوالۍ یو شمېر لويې سیمې د طالبانو له شتونه تصفیه کړي."

د دغو لوړپوړو پوځي چارواکو په وینا چې دغه عملیات به تر هغه وخت پورې دوام ولري، څو چې د دشت ارچي ولسوالۍ او کندز ټولې سیمې د طالبانو له شتونه نه‌وي تصفیه شوي.

دغه چارواکي وايي چې په دې عملیاتو کې ملکي وګړو ته کوم زیان نه‌دی رسېدلی.

د یادونې وړ ده چې د دشت ارچي ولسوالۍ د کندز مرکز شمال لوري ته موقعیت لري او د کندز د سیمه‌ییزو چارواکو په وینا چې دغه ولسوالۍ په شمال ختیځ زون کې د وسله‎والو طالبانو له مهمو مرکزونو څخه شمېرل کېږي.

بل‎خوا ذبیح‌الله مجاهد چې ځان د وسله‎والو طالبانو ویاند معرفي کوي، په دشت ارچي ولسوالۍ کې افغان ځواکونو ته د مرګ ژوبلې اړولو ادعا کوي او زیاتوي چې نیول شوي کسان ټول ملکي وګړي دي.

راپور: اجمل ارین

XS
SM
MD
LG