د افغانستان د مالیې وزیر او په افغانستان کی د اسیا پراختیایي بانک د مشر ترمنځ د سالنګ تونل د بیا رغولو تفاهم لیک لاسلیک شو.
د مالیې وزارت وايي، د سالنګ تونل په بیا رغوېدو نږدې ۳۲ میلیونه ډالره لګښت راځي.
یاد وزارت وایي، د سالنګ تونل د بیا رغولو او ترمیم تدارکاتي کارونه پیل شوي او عملي چارې به یې د ۲۰۱۷ میلادي کال په سرکې پیل او تر ۲۰۱۹ کاله پوري به دوام وکړي.
دغه تفاهم لیک د شنبې په ورځ د افغانستان د مالیې وزیر اکلیل حکیمي او په افغانستان کې د اسیا پراختیایي بانک مشر ټام پنیلا ترمنځ په کابل کې لاسلیک شو.
د مالیې وزارت ویاند اجمل حمید عبدالرحیمزي په دې اړه ازادي راډيو ته وویل:
"تدارکاتي چارې پیل شوي دي او له ۲۰۱۷ تر ۲۰۱۹ یعني دوو کلونو پوری دي چې له هغه وروسته څلورو نورو کلونو لپاره دي چې دا به وروستۍ کېږي او د مطالعاتو په برخه کې کارونه کېږي، خو تدارکاتي چاریې تر کار لاندې دي او د ۲۰۱۷ کال جنورۍ څخه یې عملاً تطبیق یې پیلېږي."
ښاغلي عبدالرحیمزي وویل چې د دغې پروژې مجموعي لګښت نږدی۳۲ میلیونه ډالره دی چې ۱۵ اعشاریه ۹۲ میلیونه یې د جاپان او پاتې نور یې د اسیا پراختیایي بانک لخوا ورکول کېږي او د حکومت لخوا به ولګول شي.
د سالنګ تونل چې د افغانستان شمالي ولایتونه له پایتخت کابل سره نښلوي نږدې ۵۰ کاله وړاندې د پخواني شوروي اتحاد په مالې مرسته جوړه شوی.
د افغانستان د مالیې وزارت چارواکي وایي، د اسیا پراختیایي بانګ له ۱۴ کلونو راپدې خوا په افغانستان کې د سړکونو او هوایې ډګرونو په جوړولو ۲ اعشاریه ۲ میلیارد ډالر لګولي دي.
په عین حال کی د ولسي جرګې د مواصلاحاتو او مخابراتو کمېسیون یو شمېر غړي وایي چې دا ځل باید د سالنګ تونل د بیا رغولو چارې د متخصصو کسانو لخوا طرحه او له با کیفیته موادو څخه کار واخیستل شي.
د دغه کمېسیون یوه غړي انجینر صاحب خان ازادي راډيو سره په خبرو کې وویل چې په تېر کې هم څو ځله د سالنګ لویه لاره رغول شوې، خو په وینا یې چې د بې کیفیته موادو د کارېدو له وجې دغه لاره بېرته ژر تخریب شوې ده.
هغه زیاته کړه:
"د سالنګ سړکونه د ژمې په موسم کې خورا له خراب وضعیت سره مخ وي او ډېر جدي ترمیم ته اړتیا لري، دوه ځلې پخوا هم سالنګ تونل بیا رغول شوی، خو د فني کسانو کمزورتیا او بې کیفیته موادو د کارولو له وجې د یوه کال په جریان کې دا تونل بېرته خراب شو، نو زموږه جدي هیله داده څو هغه نقشه چې روسانو تطبیق کړې وه هماغه نقشه بېرته ډیزاین شي."
د افغانستان د مالیې وزارت چارواکي وایي، د سالنګ لویه لاره منځني اسیا ته د ترانزیت له درکه هم مهمه ده او د افغانستان د اقتصاد په پیاوړتیا کې مهم رول لري.
راپور: ناجیه ساپۍ