د لاسرسي لېنکونه

نیویارک ټایمز:

نیویارک ټایمز ورځپاڼې په افغانستان کې د جګړې له پیلیدو ۱۵ کاله وروسته امریکایان غوره ګڼي چې په اړه یې خبرې ونه‎کړي، تر سرلیک لاندې په یوه مطلب کې لیکي:

په امریکا کې د ولسمشرۍ لپاره د انتخاباتي مبارزو په ترڅ کې هېڅ یو لوری د افغانستان د جګړې په اړه خبرې نه کوي او داسې احساسیږي چې جمهوري غوښتونکو او ډیموکراټانو په یوه نا لیکلي توافق سلا کړې چې دواړه لوري به د افغانستان د جګړې خبره په خوله نه راوړي.

د نیویارک ټایمز په وینا ان تر دې چې د دواړو ګوندونو په انتخاباتي سیالیو کې په اعتراضونو او تودو سیاسي بحثونو کې هېڅ یو لوری لېواله نه‎دی چې د هغې جګړې خبره وکړي چې تر اوسه پرې د امریکا په سلګونو میلیارډ ډالره لګېږي او د سرتېرو ژوند یې اخلي.

نیویارک ټایمز لیکي:

د افغانستان جګړه ښایي د رایې ورکوونکو لپاره نوره په زړه پورې نه وي او هغوی ښایي نور له دې پوښتنې چې بالاخره دغه ماموریت به کله پای ته رسېږي، ستړې شوې وي.

د نیویارک ټایمز په لیکنه پر دې سربېره د دواړو ګوندونو کاندیدان هم نه غواړي چې په خپلو انتخاباتي منډو ترړو کې د دغه بحران د هواري لپاره داسې وړاندیزونه وکړي چې وروسته یې عملي نه‎شي کړلای.

هېڅ یو کاندید هم له دغه ګډوډ حالت څخه د وتلو لپاره حل لاره نه لري او دا هم نه‎شي ویلای چې که امریکایي ځواکونه له افغانستانه ووځي، نتیجه به یې څه وي.

لانګ وار ژورنال:

لانګ وار ژورنال خپرونې په زابل کې ولایت کې د القاعده د یوه مرکز په له‎منځه وړلو تمرکز کړی او د مطلب په یوه برخه کې لیکي:

د افغانستان د ملي امنیت ادارې پر دې مرکز په حمله کې پنځه پاکستاني تروریستان ووژل.

د خپرونې په وینا له دې مخکې امریکايي ځواکونو د القاعده یو مرکز د پکتیکا په برمل ولسوالۍ کې کشف کړی و چې پر هغه د حملې په ترڅ کې د القاعده یو مهم مشر ابوخلیل السوډاني وژل شوی و.

لانګ وار ژورنال وړاندې په عملیاتو کې د القاعده د یوې بلې څانګې د له‎منځه وړلو خبره هم کوي چې په ترڅ کې یې د پاکستان د پخواني صدراعظم زوی علي حیدرګیلاني د تروریستانو له منګولو وژغورل شو.

ګیلاني ویلي چې دی پنجابي تروریستانو تښتولی او افغانستان ته یې وړی و.

خپرونه لیکي:

د القاعده پریوه بل مرکز، د کندهارپه شورابک کې هم عملیات ترسره شول چې ان په افغانستان کې د امریکایي ځواکونو پخوانی قومندان جنرال جان کېمپبل هم په سیمه کې له دغسې یوه مرکزه خبر نه درلود.

د خپرونې په لیکنه که څه هم امریکایي چارواکي وايي چې په افغانستان کې یې القاعده له‎منځه وړې او په دې هېواد کې د دغې شبکې د غړیو شمېر به د پنځوسواو سلو ترمنځ وي خو په دې وروستیو کې یوه امریکایي چارواکي ویلي چې یوازې په یوه کمپ کې د القاعده له یونیم سل زیات سخت دریځي موجود و او په افغانستان کې یې ښایي د غړیو شمېر له درې سوو هم زیات وي.

XS
SM
MD
LG