د لاسرسي لېنکونه

ولسي جرګه: ملګري ملتونه دې د افغانستان خلکو غوښتنو ته پام وکړي


ولسي جرګه

ولسي جرګه

افغانستان باید نور د سیمې استخباراتو د ګټو قرباني نه‌شي او ملګري ملتونه باید د افغانانو غوښتنو ته ورسېږي.

د افغانستان ولسي جرګې د ملګرو ملتونو په عمومي غونډه کې د افغانستان د ستونزو په اړه د قاطع پرېکړو لپاره د نړۍ مشرانو ته د هیلې سترګې نیولي دي.

د دې جرګې مشر عبدالرؤف ابراهیمي د چهارشنبې په ورځ د ولسي جرګې عمومي غونډې ته وویل چې افغانان د قربانیو له ورکولو ستړي شوي او د دې وخت راغلی چې نړۍ د سیمې د استخباراتو په وړاندې چې د ده په وینا په افغانستان کې یې د جګړو اور بل ساتلی لاس په کار شي.

د ولسي جرګې رئیس عبدالرؤف ابراهیمي

د ولسي جرګې رئیس عبدالرؤف ابراهیمي

ښاغلي ابراهیمي د نړۍ له مشرانو وغوښتل چې له افغانانو سره همغږي شي.

دی وايي:

"د دې فرصت څخه په ګټې اخیستنې سره چې د نړۍ مشران د ملګرو ملتونو په تالار کې راغونډ شوي، د ملي یووالي حکومت له مشرانو غواړو چې د جنګ ځپلو او دردېدونکو افغانانو فریاد د دوی تر غوږونو ورسوي چې دا هېواد د سیمې د استخباراتو د ګټو قرباني ګرځېدلی دی."

د افغانستان ولسي جرګه داسې مهال د سیمې د ځينو هېوادونو په وړاندې د نړۍ د جدي اقدام غوښتنه کوي چې له دې وړاندې دې جرګې د ملګرو ملتونو په غونډو کې د پاکستان په وړاندې د افغان حکومت د قاطع دریځ په نه‌درلودو هم انتقادونه کړي دي.

دې پرله‌پسې انتقادونو، څه موده وړاندې د جمهور رئیس مرستیال ویاند دوا خان مینه‎پال ازادي راډیو ته ویلي چې افغان حکومت په ملګرو ملتونو کې خپل ځانګړي استازي ته دا وظیفه سپارلې چې دې شورا ته د پاکستان پر ضد شکایت مطرح کړي.

دوا خان مینه‎پال اوس وايي چې د دې هېوادونو په وړاندې د افغانستان پالېسي روښانه ده او د جمهور رئیس دوهم مرستیال سرور دانش به د ملګرو ملتونو سږنۍ غونډې ته د افغان حکومت دریځ لازیات روښانه کړي.

د جمهور رئیس مرستیال ویاند دوا خان مینه‎پال

د جمهور رئیس مرستیال ویاند دوا خان مینه‎پال

ښاغلي مینه‎پال زیاته کړه:

"له شک پرته نړۍ اوس افغانستان درک کړی او له دې هېواد سره همغږی دی او د افغانستان هرې غوښتنې ته لبیک وايي، تاسې ولیدل چې د نړۍ مشرانو د وارسا غونډه کې له افغانستانه دفاع وکړه او باید ووایم چې د ولسمشر دوهم مرستیال د ملګرو ملتونو په عمومي غونډه کې د افغانستان موقف روښانه کوي."

ښاغلی مینه‎پال ټينګار کوي چې نړیواله ټولنه اوس د افغانستان تر څنګ ده او له دې هېواده ملاتړ کوي.

خو دا چې د نړۍ مشران به د افغانستان د ولسي جرګې او افغان حکومت غوښتنو ته څه ځانګړی ځواب ولري تر اوسه روښانه نه‌ده.

له دې ټولو سره سره د ولسي جرګې مشر عبدالرؤف ابراهیمي د ملګرو ملتونو سږنۍ غونډه د افغانستان لپاره یو ښه فرصت بولي، ټینګار کوي چې افغان حکومت باید دا فرصت د اقتصادي او امنیتي ستونزو د مهارولو او د پاکستان دسیسو په وړاندې د قاطع تصمیم په برخو کې له لاسه ورنه‎کړي.

راپور: یوسف خان ځدراڼ

XS
SM
MD
LG