د لاسرسي لېنکونه

د قطر امیر د خلیج له عربو هېوادونو او ایران غوښتي چې خپل اختلافات دې د خبرو له لارې هوار کړي.

د قطر دولتي خبري اژانس وايي چې تمیم بن حمد الثاني د ایران له ولسمشر حسن روحاني سره د لوی اختر په مناسبت په ټیلیفوني خبرو کې نوموړي ته ویلي چې د ایران او د خلیج د عربي هېوادونو تر منځ اړیکې باید د ښه ګاونډیتوب او دوه اړخیز درناوي پر بنسټ ولاړې وي.

نوموړي زیاته کړې د ایران او عربي هېوادونو تر منځ هر ډول اختلاف باید د خبرو اترو له لارې هوار شي.

د ایران شیعه دولت او د سعودي عربستان په مشرۍ عربي هېوادونه په یمن او سوریه کې د نیابتي جګړې په دوو مخالفو لورو کې ولاړ دي.

د قطر امیر دا غوښتنه په داسې حال کې کوي چې د حج د مراسمو په اړه د ایران او سعودي عربستان تر منځ لفظې شخړې تودې شوې دي.

په تېرو دېرشو کلونو کې د لومړي ځل لپاره سږ کال ایرانیان د حج په مراسمو کې د ګډون څخه بې برخې شوي دي.

د سعودي عربستان لوی مفتي عبدالعزیز الشیخ ویلي چې ایراني مشران مسلمانان نه‎دي.

XS
SM
MD
LG