د لاسرسي لېنکونه

د سعودي عربستان دفاع وزارت مرستیال ژمنه کړې چې هېواد به‌یې له افغانستان سره په بېلابېلو برخو په ځانګړي توګه د امنیت او ثبات په ټېنکښت کې همکاري وکړي.

د ارګ څخه د یوې خپرې شوې خبرپاڼې له مخې محمد عبدالله المزید پرون په کابل کې له ولسمشر اشرف غني سره وکتل.

خبرپاڼه د سعودي عربستان د دفاع وزیر مرستیال له خولې زیاتوي:

"افغانستان د ترهګرۍ پر ضد د مبارزې په لومړۍ کرښه کې دی او دا هېواد د ترهګرۍ قرباني دی."

نوموړې ویلي، د اړتیا په صورت کې به عربستان په افغانستان کې د سولې او ثبات د ټینګښت او له ترهګرۍ سره د مبارزې په برخه کې هر اړخیزه همکاري وکړي.

د ارګ خبرپاڼه په دې لیدنه کې د ولسمشر غني له خولې وايي:

"د نړۍ ټول هېوادونه په ځانګړي توګه اسلامي هېوادونه باید په ډله‌ییزه توګه د ترهګرۍ د مفکورې پر ضد مبارزه وکړي."

ولسمشر غني یو ځل بیا ترهګري یوه نړیواله پدیده بللې او پر ضد یې په ګډو نړیوالو هڅو او د ترهګرو د سرچینو په له‌منځه وړلو ټینګار کړی دی.

XS
SM
MD
LG