د لاسرسۍ وړ لېنکونه

تازه خبر
سه شنبه ۲۹ کب ۱۴۰۲ کابل ۱۰:۰۵

خبرونه

د ايټاليا ساحلي ساتونکو ٦٥٠٠ پناه غوښتونکي وژغورل

د ايټاليا ساحلي ساتونکو نن وويل د ليبيا سواحلو ته نژدې يې شا و خوا شپږنيم زره پناه غوښتونکي چې په ماتو-ګوډو کښتيو کې سپاره وو، وژغورل.

دا په ٢٠١٦م کال کې په يوه ورځ اروپا ته د روانو کډوالو تر ټولو ستره جوپه ګڼل کېږي.

د ايټاليا چارواکو نن وويل چې د ژغورنې ٤٠ عملياته يې کړي او ډېرى افريقايي پناه غوښتونکي يې چې په دغو کښتيو کې سپاره وو، وژغورل.

د ايټاليا چارواکو وړمه ورځ هم شا و خوا يوولس سوه نور پناه غوښتونکي چې په وړو کښتيو کې اروپا پر لار وو- وژغورل.

د مهاجرت نړيوال سازمان د جمعې په ورځ وويل، په ٢٠١٦م کال شا و خوا يولک او پنځه زره پناه غوښتونکي د کښتيو په مرسته ايټاليا ته رسېدلي، په دوى کې ډېرى يې له ايټاليا نورو اروپايي هېوادونو ته تللي دي.

دغې ادارې وويل چې روان ميلادي کال شا و خوا دوه زره او اووه سوه شپږويشت کسان د مديترانې په سمندرګي کې د خطرناک سفر پر مهال مړه شوي دي.

د ورځې تازه خبرونه دلته ولولئ

اروپایي شورا له اوکراین سره د مرستو صندوق جوړ کړ

د اروپایي ټولنې بیرغ
د اروپایي ټولنې بیرغ

اروپايي شورا له اوکراین سره د مرستو صندوق جوړ او د ۵،۴ میلیاردو ډالرو مرستو ژمنه یې وکړه.

اروپايي شورا داسې وخت د اوکرایین د مرستو صندوق تصویب کړ چې کییف د روسیې یرغلګرو ځواکونو په وړاندې په مبارزې کې له ستونزو سره مخ دی.

د اروپايي ټولنې د بهرني سیاست مشر جوزیپ بوریل په یوه بیان کې پرون وویل په نویو مرستو سره به د اوکرایین لاسنیوی وکړو چې د روسي ځواکونو د یرغل په وړاندې د ځان دفاع وکړي.

د اروپايي ټولنې نوې مرستې به د اوکراییني ځواکونو لپاره د پوځي تجهیزاتو په پېرلو او روزنو کې وکارول شي.

هند او چین پوتین ته په ولسمشریزو ټاکنو کې د بري مبارکي ورکړه

د پوتین یو ټاکنیز تصویر
د پوتین یو ټاکنیز تصویر

چین او هند د روسیې د ولسمشر په توګه د ولادمیرپوتین په بیا ټاکل کېدو هغه ته مبارکي ورکړې.

لویدیځو هېوادونو بیا د روسیې ټاکنې غیرقانوني بللي؛ ځکه د دوی په خبره په ځپونکو شرایطو او د یوه معتبر سیال په نشتوالي کې وشوې.

د روسیې د ټاکنو د پایلو په اساس، ۷۱ کلن پوتین د څه باندې ۸۷ فیصده رایو په ګټلو یو وار بیا ددغه هېواد ولسمشرۍ ټاکنې ګټلي.

د هند صدراعظم نرېندرا مودي پوتین ته مبارکي ورکړې او د روسیې او هند د خاصو اړیکو د پراختیا هیله یې ښودلې.

بېجنګ هم ویلي چې د روسانو ملاتړ کوي.

د امریکا د بهرنیو چارو وزارت بیا د روسیې ټاکنو ته په اشارې ویلي چې دا یوه غیر ډيموکراټیکه پروسه وه.

د برېټانیا د بهرنیو چارو وزیر ډېوېډ کامرون ویلي د اوکرایین په اشغالي سیمو کې ټاکنې ناقانونه وې او په ټوله کې دا ټاکنې د پوتین په رژیم کې د ځپونکو اقداماتو عمق ښيي.

د افغانستان د کرکټ ملي لوبډلې بېګا ایرلنډ ته ماته ورکړه

د لوبې یوه څنډه
د لوبې یوه څنډه

د افغانستان د کرکټ ملي لوبډلې ایرلند ته ماته ورکړه او د شل اووریزو لوبو سیریز یې دوه پر یو وګاټه.

افغانستان بېګا په وروستۍ/درېیمه شل اووریزه لوبه کې چې په شارجه کې وشوه د ایرلند لپاره د ۱۵۶ منډو هدف ټاکلی وو. د ایرلند ټول ټیم په ۹۸ منډو اوټ شو او افغانستان د ۵۷ منډو په توپیر لوبه وګټله.

د افغانستان لپاره په بټنګ کې ابراهیم ځدراڼ تر ټولو ډېرې ۷۲ ناسوځېدلې منډې وکړې. په بالنګ کې هم عظمت الله عمرزي په ۴ اورونو کې ۴ وېکټې واخیستې او یواځې ۹ منډې یې ورکړې. نوین الحق درې وېکټې واخیستې.

امریکا کې یو افغان کډوال د قضیه په یوه قضیه کې مجرم وپېژندل شو

تصویر له ارشیفه
تصویر له ارشیفه

یو افغان کډوال په امریکا کې د یوه سړي د وژنې په قضیه کې مجرم وپېژندل شو.

د اسوشیتید پرېس د راپور له مخې، ۵۱ کلن محمد سید ښايي د یوه بل مسلمان ۴۱ کلن افتاب حسین د وژنې په خاطر له عمر بند سره مخ شي.

د ۲۰۲۲ کال د جولای په ۲۶مه د امریکا د نیومکسیکو ایالت په البوکرکي ښار کې درې کسان ووژل شول چې یو یې افتاب حسین وو.

د محمد سید محکمه د دوشنبې په ورځ وشوه او څارنوالانو شواهد وړاندې کړل چې د هغه مبایل یې د جرم له صحنې موندلی او هم د مرمیو د پوچکو له مخې ښکاري چې ډزې په هغه ټوپک شوي چې د محمد سید له کوره موندل شوی.

څارنوالان په نیومکسیکو کې د دوو نورو کسانو د وژنې په قضیه کې هم د محمد سید ښکېلتیا پلټي.

امریکا: په افغانستان کې د پاکستان د بمبارۍ له امله ملکي مرګ ژوبلې ته اندېښمن یوو

د امریکا د بهرنیو چارو وزارت مرستیال ویاند، ودانت پتیل
د امریکا د بهرنیو چارو وزارت مرستیال ویاند، ودانت پتیل

امریکایي چارواکو ویلي چې په افغان خاوره د پاکستان د هوایي بریدونو په اړه اندېښنه لري.

د امریکا د بهرنیو چارو وزارت مرستیال ویاند ودانت پتیل په یوه کنفرانس کې پرون وویل چې د پاکستان په هوایي بریدونو کې افغان ملکیانو ته د مرګژوبلې په اوښتو خواشینی دی او په پاکستان غږ کوي چې د ترهګرۍ ضد هڅو کې د ملکیانو خوندیتوب ته پام وکړي.

هغه همداراز د خیبرپښتونخوا د میرعلي د شنبې په برید هم اندېښنه وښوده چې وسله والو اوه پاکستاني عسکر ووژل.

پر افغان خاوره د پاکستان د بریدونو په تړاو پخواني ولسمشر حامدکرزي ویلي چې دا بریدونه په کلکه غندي او د افغانستان په خاوره ښکاره تېری او د نړیوالو قوانینو خلاف عمل دی.

کرزي ټینګار کړی چې پاکستان باید له داسې کړنو لاس واخلي، ځکه د دواړو هېوادونو په زیان تمامیږي.

اوکراین: د روسیې ۱۷ بریدګرې بې پيلوټه الوتکې مو وویشتې

اوکراین وايي، د هوایي مدافعې ځواک یې د روسیې له هغو ۲۲ ډرونونو څخه چې د دې هېواد بېلابېلې سیمې یې په نښه کړې ؛ ۱۷ ویشتلي او له منځه وړي دي.

د اوکراین پوځ نن پر خپل ټلګرام پاڼه په یوه بیان کې چې دا بې پیلوټه الوتکې د پلازمېنې کییف، پولتاوا، خمیل نیتڅکي، چرکاسي، کیرو ووهراد، دنیپرو پتروفسک او څو نورو سیمو په فضا کې په نښه شوې.

د پوځ په بیان کې راغلي دي چې پر خارکییف او سومي سیمو هم د ۷ توغندیو په وسیله حملې وشوې.

د اوکراین پوځ د دې حملو د تلفاتو په اړه څه نه دي ویلي، خو د سومي سیمې سیمه ییزو چارواکو ویلي دي چې د سیمې ملکي تاسیسات زیانمن شوي دي.

طالب چارواکي: بدخشان کې مو د یوه تاریخي اثر د قاچاق مخه نیولې ده

د افغانستان په نقشه کې بدخشان ولایت
د افغانستان په نقشه کې بدخشان ولایت

په بدخشان ولایت کې د طالبانو سیمه ییز چارواکي وايي، د هغه تاریخي اثر د قاچاق مخه یې نیولې ده چې ۳۳۴ کاله لرغونتوب لري.

باختر خبري اژانس چې طالبان یې اداره کوي؛ د بدخشان ولایت د استخباراتو د چارواکو له قوله خبر ورکوي چې دا اثر یوځانګړی کاغذ دی چې ۹ متره اوږدوالی او ۴۰ سانتي متره سور لري او وزن یې ۳۰۰ ګرامه دی.

د خبر له مخې، پر دې کاغذ د سروزرو او لاجوردو په اوبو د پیغمبرانو شجرې لیکل شوې دي.

د طالبانو دفاع وزارت: پر پاکستاني ځواکونو مو ځوابي بريدونه کړي

له ارشيفه د طالبانو د يو شمېر ځواکونو تصوير
له ارشيفه د طالبانو د يو شمېر ځواکونو تصوير

د طالبانو حکومت د ملي دفاع وزارت وايي، ځواکونو یې د پاکستاني الوتکو د نن سهار د بریدونو په غبرګون کې د پاکستان پوځي مرکزونه په نښه کړي دي.

دې وزارت په خپله ایکس‌پاڼه په یوه اعلامیه کې لیکلي: "د وی سرحدي ځواکونو د ډیورنډ فرضي کرښې په اوږدو کې د پاکستان پوځي مرکزونه د درنو وسلو په وسیله په نښه کړل. "

د طالبانو حکومت د دفاع وزارت په اعلامیه کې زیاته شوې، د دوی دفاعي او امنیتي ځواکونه د هر ډول تېري کوونکو کړنو ځواب ورکولو ته چمتو دي او په هر ډول حالاتو کې به له خپلې ځمکنۍ بشپړتیا دفاع وکړي.

دا په داسې حال کې ده چې د پکتیا د ډنډ پټان ولسوالۍ څخه سرچینو ازادي راډیو ته ویلي، طالب ځواکونو نن سهار په سیمه کې له پاکستاني عسکرو سره نښته کړې.

تر اوسه دواړو لوریو ته د دې نښتې له امله د مرګ‌‌ ژوبلې په اړه دقیق او رسمي ارقام نه‌ دي خپاره شوي.

اردن: سوریې سره د پولې اوږدو کې مو د نا معلومو سرچینو د الوتکو شکمن حرکتونه کشف کړي

د اردن نقشه
د اردن نقشه

د اردن پوځ نن دوشنبه ویلي چې د هوايي مدافع رادار دستګاه یې د سوریې د پولې په اوږدو کې د یوې نامعلومې سرچینې د الوتکو مشکوک تحرکات کشف کړي دي.

د رویټرز خبري اژانس د خبر له مخې، عیني شاهدانو ویلي، هغه جټ الوتکې چې ویل کېږي د اردن به وې د اردن د اربد ښار پر فضا او د سوریې پولې ته څېرمه په هوا کې د ګرځېدو په حال کې لیدل شوي دي.

د اردن پوځ وايي، د هوايي ځواک هغو الوتکو ته کوم خطر متوجه نه و چې د هوايي حریم د خوندیتوب د یقیني کولو لپاره یې الوتنه کړې وه.

اردن نه دي ویلي چې دغه تحرکات د کوم هېواد له خوا وو.

یونیسف: غزه کې د اسراییل د عملیاتو پر مهال تر ۱۳ زرو زیات ماشومان وژل شوي

د غزې یوه جګړه ځپلې څنډه
د غزې یوه جګړه ځپلې څنډه

د ماشومانو د ملاتړ لپاره د ملګرو ملتونو مرستندوی صندوق یا یونیسف وايي په غزه کې د اسراییل په عملیاتو کې تر ۱۳۰۰۰ زیات ماشومان وژل شوي دي.

د دې ادارې په وینا، په غزه کې ګڼ ماشومان له خوارځواکۍ کړېږي او حتی د ژړا انرژي هم نه لري.

د یونیسف اجرایه مشرې کاترین رسل (Catherine Russell) د امریکا له CBS نیوز ټلویزیوني شبکې سره په خبرو کې پرون وویل، په زرګونو نور ماشومان یا ژوبل شوي یا هم په دې نه پوهېږي چې چېرې دي، هغوی ښايي تر نړېدلو ودانیو لاندې وي.

د هغې په وینا، دوی د نړۍ په یوه شخړه کې هم د ماشومانو دومره لوی شمېر مړینه نه وه لیدلې.

پر اسراییل په جګړه کې د زیاتې مرګ ژوبلې، په غزه کې د لوږې زیاتېدو او د مرستو د مخنیوي له کبله په نړیواله سطحه انتقادونه شوي دي.

د حماس تر ولکې لاندې د غزې روغتیا وزارت وايي، په دې جګړه کې تر ۳۱زرو ډېر کسان وژل شوي دي، هغه شمېرې چې خپلواکو سرچینو تایید کړي نه دي.

د امریکا متحد ایالتونه او اروپايي ټولنه حماس ډله یو ترویستي سازمان ګڼي.

نور راوښيه

XS
SM
MD
LG