د موی تای په نړیوالو سیالیو کې دوه افغان لوبغاړو د دې سیالیو وروستي پړاو ته لار پیدا کړه.
د افغانستان د موی تای فدراسیون د رسنیو مسؤل علي ظفر عاطفي ازادي راډیو ته وویل چې د دې سیالیو په وروستي پړاو لوبو کې به علي سهراب احمدي د ۴۵ کېلو وزن او زهرا رضایي د ۴۸ کېلو وزن په درلودلو سره د خپلو ټایلنډي سیالانو سره میدان ته ووځي.
نوموړي زیاته کړه چې علي سهراب احمدي د خپل عراقي او بلجیمي او زهرا رضایي د خپلو اوکرایني او پیرو هېوادونو سیالانو ته د ماتې په ورکولو سره د دغو سیالیو وروستي پړاو ته ځان ورساوه.
د ښاغلي عاطفي په خبره چې په دغو سیالیو کې چې شپږو افغان لوبغاړو ګډون کړی د اګسټ په ۲۶مه پیل شوې وې او سبا پای ته رسېږي.