د لاسرسي لېنکونه

د فېروزکوه فرهنګي انسټیټوټ د چهارشنبې په ورځ په کابل کې د پورټال پروګرام نندارې ته وړاندې کړ.

افغانستان په دې وروستیو کې د پورټال د پروګرام د فعالېدو شاهد شو.

د دې پروګرام له لارې یو فرد یا د خلکو یوه ډله کولای شي چې په لنډه شېبه کې خپل نظریات او لاسته راوړنې، د نړۍ په هرګوټ کې له بل کس یا د خلکو له ډلې سره شریکې کړي.

د فېروزکوه انسټیټوټ مسؤلینو د چهارشنبې په ورځ د پورټال د پروګرام د وړاندې کولو پر مهال وویل، له دې لارې کولای شو چې خپل فرهنګ نړیوالو ته ور وپېژنو.

مهمند وویل، په لږه موده کې به د پورټال کانټینر د کابل ښار په یوه سیمه کې کېښودل شي

مهمند وویل، په لږه موده کې به د پورټال کانټینر د کابل ښار په یوه سیمه کې کېښودل شي

د دې انسټیټوټ د فرهنګي برخې مشر وهاب مهمند وویل، په لږه موده کې به د پورټال کانټینر د کابل ښار په یوه سیمه کې کېښودل شي او افغانان به ځیني په وړیا توګه ګټه واخلي.

ښاغلي وهاب زیاته کړه:

"پورټال د هغو هنرمندانو او شخصیتونو د پېژندګلوۍ لپاره دی چې اهداف یې هنري او فرهنګي وي، موږ غواړو د دوی ترمنځ یو ارتباطي پُل واوسو، د هغو هېوادونو ترمنځ چې د پورټال په پروژه کې شامل دي."

د پورټال پروګرام څوکاله دمخه د افغانانو لپاره د یو خوب په شان و، خو نن سبا تکنالوژۍ پرمختګ کړی او دوی کولای شي چې پر انټرنیټي خدمتونو سربېره، د پورټال د پروګرام له لارې د نړۍ په نورو سیمو کې تر شلو دقیقو پورې، له یو کس یا د خلکو له یوې ډلې سره، خبرې وکړي او نظریات ور سره تبادله کړي.

دا په‎داسې حال کې ده چې افغانستان په څو کلونو جنګونو کې د نوي ټکنالوژې له پرمختګونو وروسته پاتې شوی خو په وروستیو څه باندې لسو کلونو کې له نوې تکنالوژۍ څه نا څه بلد شوی دی.

دې پورټال له لارې کولای شو چې خپل فرهنګ نړیوالو ته ور وپېژنو

دې پورټال له لارې کولای شو چې خپل فرهنګ نړیوالو ته ور وپېژنو

یو شمېر ځوانان چې د پورټال د پروګرام نندارې ته راټول شوي وو، هیله یې وښوده دغه پروګرام ګټور واوسي.

عبدالمتین ملک زاده وویل:

"زما هنر سرامیک او د سفالي جوړولو افغاني هنر دی او علاقه لرم چې په دې برخه کې څيړنه وکړم او تجربې حاصلې کړم."

همدارنګه د تمنا په نامه یوې نجلۍ ازادي رادیو ته خپل نظر داسې ووایه:

"دا له بهرنیو هنرمندانو سره د اړیکو ټینګولو ښه فرصت دی، ځکه چې افغانان بهرنیو هېوادونو ته په تګ کې د ویزې ستونزه لري او څوک چې غواړي افغانستان ته راشي هغوی، د امنیت ستونزه لري."

د افغانستان د مخابراتو وزارت وايي، معلوماتي تکنالوژۍ په وروستیو کلونو په هېواد کې د پراختیا په حال کې ده او هڅې کېږي چې په دې برخه کې خلکو ته نورې اسانتیاوې هم برابرې شي.

د پورټال د پروګرام مسؤلینو دا هم وویل، په پام کې ده چې په نېږدې وختونو کې د افغانستان فرهنګ او هنر د دغه پروګرام له لارې په امریکا کې خلک ننداره کړي.

راپور خان محمد سیند

XS
SM
MD
LG