د امریکا د متحدو ایالتونو ولسمشر جو بایډن د پوځي مرستو د بستې هغه لایحه توشیح کړه چې تر دې څو ساعته مخکې د امریکا مشرانو جرګې تصویب کړې وه.

هغه ویلي اوکراین ته به په څو ساعتونو کې د څه کم ۶۱ ملیار ډالرو په ارزښت د امریکا د دغې پوځي مرستې رسول پیل شي.

په سپینه ماڼۍ کې د دې لایحې تر لاسلیک وروسته ولسمشر بایډن وویل، د مرستو دغې بستې ثابته کړه چې امریکا او متحدان یې د روسي ځواکونو د یرغل په وړاندې د اوکراین بشپړ ملاتړ کوي.

د هغه په وینا، د دې مرستې تصویب مهم و چې وښيي موږ د روسیې د ولسمشر ولادمیر پوتین په وړاندې درېږو.

د مرستو په دغه بسته کې د اوکراین لپاره څه کم ۶۱ ملیارد ډالره ځانګړي شوي، ۲۶ ملیارد ډالره د اسرائیل او څه باندې ۸ ملیارد ډالره په هندوپسفیک یا هند- ارام سمندرګي سیمه کې د چین د نفوذ د مخنیوي لپاره اختصاص شوي دي.

د ایران یوې ورځپاڼې راپور ورکړی چې د ایران د رژیم یو مخالف رپ سندرغاړی توماج صالحي چې په زندان کې دی، په اصفهان کې د یوې محکمې له خوا په مرګ محکوم شوی دی.

شرق ورځپاڼې نن راپور ورکړی چې صالحي په ۲۰۲۲م کال کې په اعتراضونو کې د خپل ګډون له کبله د بند شپږکلنه موده تېروي.

هغو اعتراضونو د څو میاشتو لپاره ایران ته ټکان ورکړی و.

د توماج صالحي مدافع وکیل امیر ریسیان دغې اصلاح غوښتونکې ورځپاڼې ته ویلي، پر موکل یې پر ځمکه د فساد خپرولو تازه تور لګول شوی او په مرګ محکوم شوی دی.

هغه ویلي دوی به د استیناف غوښتنه وکړي.

د تاجکستان د اپوزیسیون یوې ډلې فعالانو نن وویل چې په ایټالیا کې پولیسو د دوی اته تنه د سې شنبې په ورځ نیولي دي.

د تاجکستان د څلرویشت ډلې په نوم د اپوزیسیون یو شمېر فعالان له اروپایي هېوادونو څخه د ایټالیا پلازمېنې روم ته تللي دي.

دوی غواړي چې ایټالیا ته د تاجکستان د ولسمشر امام علي رحمان د سفر پرمهال په یوه لاریون کې برخه واخلي او د هغه پر تګلارو انتقاد وکړي.

امام علي رحمان د دوشنبې په ورځ ایټالیا ته په رسمي سفر ولاړ.

د څلرویشت ډلې موسس عمرعلي قوت اوف د دوه زره پنځلسم کال په مارچ کې د ترکیې په استانبول کې وژل شوی و.

د روسیې د سمولینسک سیمې چارواکي واسیلي انوخین نن په ټیلګرام کې لیکلي دي چې د دوی د سیمې د تېلو او انرژۍ پر تاسیساتو د اوکرایني ډرون الوتکو د برید له امله اور لګېدلی دی.

انوخین زیاتوي چې تلفات نه دي اوښتی او اور د بېړنیو چارو د ادارې کارکوونکو مړ کړی دی.

د برېتانیا صدراعظم ریشي سوناک به د جرمني له صدراعظم اولاف شولڅ سره نن پر امنیتي او دفاعي چارو خبرې وکړي.

ریشي سوناک اتلس میاشتې مخکې د برېتانیا صدراعظم شو او له صدرات راوروسته یې دا برلین ته لومړی سفر دی.

اټکل کیږي چې دوی به تر ډيره د اوکراین پر مسالې تمرکز وکړي او په اروپا کې به د ناټو د هوایي دفاع د پیاوړتیا پر مسالې وغږیږي.

د امریکا د بهرنیو چارو وزارت پر ایران نور بندیزونه ولګول.

په دې بندیزونو کې چې پرون د خزانې وزارت اعلان کړل، ۴ کسان او هغه دوه شرکتونه شامل دي چې د خزانې وزارت د بیان له مخې د ایران د پوځ په لارښوونه په ورانکارو سایبري فعالیتونو کې ښکېل وو.

پر دې سربېره د امریکا د عدلیې وزارت او د تحقیقاتو فدرال ادارې اعلان کړی چې په دې بندیزونو کې شامل ۴ کسانو پر امریکايي موسسو په سایبري حملو کې لاس درلود.

د امریکا ولسمشر جوبایډن وايي له اوکراین او نورو هېوادونو سره د دې هېواد د مرستو هغه لایحه به سمدستي توشیح کړي چې د مشرانو جرګې پرون ناوخته تصویب کړه او اوکراین ته د پوځي مرستو بیاپیل ته لاره اواروي.

ښاغلي بایډن بېګا په یوه بیان کې وویل، د مرستو دا لایحه به چې کله د ده دفتر ته ورسېږي سمدستي توشیح کړي او بیا به د امریکا خلکو ته وینا وکړي.

بایډن زیاته کړه چې د نوموړې لایحې له توشیح وروسته به په روانه اوونۍ کې اوکراین ته د وسلو او تجهیزاتو د استولو لړۍ پیل شي.

د ۹۵ میلیارد ډالر په ارزښت د امریکا د مرستې دا لایحه د استازو جرګې له څو میاشتني ځنډ وروسته د تېرې شنبې په ورځ تصویب کړه خو سنا پرون په ډېرې اسانۍ سره تایید کړه.

په دې مرسته کې څه باندې شپېته میلیارد ډالر د اوکراین لپاره ځانګړي شوي دي.

د سنا د اکثریت د مشر چک شومر په وینا، د دې مرستو پاتې برخه له غزې نیولې تر سوډانه په جګړو کې د ایسارو ملکي وګړو لپاره ځانګړې شوې.

ملګرو ملتونو د غزې د تړانګې په دوو لویو روغتونو کې د موندل شویو ډله ییزو قبرونو په اړه د رڼو او بې پرې تحقیقاتو غوښتنه کړې.

په دې روغتونونو کې اسراییلو پوځي عملیات کړي وو.

د ملګرو ملتونو ویاند ستیفان دوجاریک پرون خبریالانو ته وویل، څېړونکي باید اړوندو ساحو ته د ورتګ اجازه ولري او زیاته یې کړه چې ژورنالېستانو ته هم په غزه کې په دې اړه د راپور ورکولو لپاره باید د خوندي کار اجازه ورکړل شي.

پرون له دې مخکې د ملګرو ملتونو د بشري حقونو مشر وولکر تورک وویل چې د غزې د الشفا روغتیايي مرکز او د خان یونس د الناصر روغتون د ورانېدو د خبر په اورېدو بوږنېدلی دی.

د غزې د نوازه په سیمه کې د العوده – نصیرات روغتون د اداري ودانۍ پنځم پوړ او چت تر برید لاندې نیول شوی.

د روغتیا نړیوال سازمان مشر ټیډروس ادهنوم ګیبرسیوس د سه شنبې په ورځ (اپریل ۲۳ مه) په ایکس شبکه (پخواني ټویټر) کې د جګړې له ښکیلو خواوو څخه وغوښتل چې په روغتونونو له برید او پوځې کاروونې ډډه وکړي او د اوربند او سولې لپاره کار وکړي.

ګبرسیوس دا هم لیکلي چې په نصیرات روغتون وروستي برید له امله د یاد روغتون د بریښنا سولري سیسټم خرابه شوی دی. د روغتون د اوبو او تېلو زیرمو ته هم د زیان رسېدو خبر ورکړل شوی دی.

نصیرات – العوده روغتون هره ورځ لږ تر لږه ۱۲۰۰ ناروغانو ته طبي خدمات وړاندې کوي او شاوخوا 209 کارکوونکي لري.

د روغتیا د نړیوال سازمان په وینا، په دې برید سره، د ۲۰۲۳ کال له اکټوبر څخه تر اوسه پورې، د غزې په تړانګه کې د ۳۶ روغتونونو له جملې څخه، ۳۱ روغتونونه زیانمن شوي.

یو بریتانوي حقوقي ویب پاڼې خبر ورکړی دی چې د امریکا د کولمبیا سیمه ایزې محکمې د افغانستان د پرځول شوي حکومت د ولسي جرګې د پخواني ریس میر رحمان رحماني او د هغه د زوی اجمل رحماني هغه غوښتنه رد کړې چې دې دواړو او دوی سره د تړلو بنسټونو په اړه یې د امریکا د حکومت د دوو ادارو له خوا د شوې پریکړې ننګول غوښتل.

د ګلوبل سنکشنز ویب پاڼې د اپریل په ۲۳ مه د سه شنبې په ورځ په دې اړه د اپریل د ۱۹ مې نیټې یو قضايي سند هم خپور کړی دی. دا ویب پاڼه نړیوال بندیزونه په ځانګړې توګه هغه بندیزونه چې د امریکا متحده ایالتونو له خوا لګول کیږي تعقیبوي.

خو له هغه قضايي سند څخه چې د اپریل په ۱۹مه خپور شوی، ښکاري چې دا قضیه پای ته نه ده رسېدلې او قضايي بهیر به دوام وکړي.

تر دې مخکې د امریکا د خزانې وزارت د ۲۰۲۳ م کال د ډیسمبر د میاشتې په یولسمه نیټه پر میر رحمان رجماني، زوی یې اجمل رحماني او په دوی پورې اړوند ۴۴ بنسټونو د هغه څه له کبله چې د افغانستان له پولو وتلي فساد کې یې د دوی ښکیتیا بللې وه بندیز لګولی و.

د امریکا د بهرنیو چارو وزارت هم په همدې نیټه د یوې مفصلې اعلامیې په یوه برخه کې رحمانيان د سون د هغو موادو له قراردادونو څخه د میلونونو ډالرو په غلا تورن کړي وو چې د امریکا متحده ایالتونو یې لګښت ورکوه.

خو هغه مهال میر رحمان رحماني په خپل فیسبوک کې یوې خپرې کړې ګډې اعلامیې پر ده او زوی یې د امریکايي ادارو تورونه په بشپړه توګه رد کړل.

د افغانستان په پرځول شوي جمهوریت کې اداري فساد یوه له لویو ستونزو ګڼل کیده.

تصحیح: دا خبر د نور معلوماتو د زیاتولو په خاطر اپډیټ شو