د لاسرسي لېنکونه

اوباما: د القاعده او طالبانو د واک ختمولو سره مهمې لاسته راوړنې لرو


د متحده ایالاتو ولسمشر وايي هېواد يې په افغانستان کې د القاعده او طالبانو د واک په ختمولو سره په دې هېواد کې مهمې لاسته راوړنې لري.

باراک اوباما دا څرګندونې پرون د متحده ایالاتو د پخوانیو معلولو شوو سرتېرو او افسرانو کلنی غونډې ته په وینا کې وکړې.

ولسمشر اوباما وویل:

"تاسو ټولو چې په افغانستان کې خدمت کړی دی، په هغه پرمختګونو کې چې تاسې يې په لاسته راوړلو کې مرسته کړې، له ویاړ څخه برخمن یاست، د القاعده کمپونه مو له مینځه یوړل، د طالبانو رژیم مو نسکور کړ او د اسامه بن لادن په برخه کې مو عدالت پر ځای کړ."

پخوانیو سرتېرو ته د باراک اوباما تر دې وینا مخکې د طالبانو دریو ځانوژونکو د کابل په ختیځ کې د نارټ ګېټ په نوم میلمستون باندې حمله وکړه چې په نتیجه کې يې د پولیسو یو افسر ووژل شو او څلور نور ژوبل شول.

یاده حمله کې یو افغان پولیس ووژل شو

یاده حمله کې یو افغان پولیس ووژل شو

والستریټ ژورنال ورځپاڼه وايي په نارت ګیټ کې د امریکا پوځي قراردادیان او د نړیوالو موسسو بهرني کارکونکي اوسېږي.

طالبانو تېره میاشت په کابل د پولیسو پر یوه کاروان برید وکړ چې لږ ترلږه ۳۰ سرتېري په کې ووژل شول.

فري بیکن خپرونه وايې یو شمېر کتونکې په افغانستان کې د امنیتي وضیعت د خرابېدو پړه د ولسمشر اوباما پر اداره اچوي.

دا کتونکي وايي، مخکې له دې چې افغان امنیتي ځواکونه د خپل هېواد د امنیت د ساتلو جوګه شي، ولسمشر اوباما په دې هېواد کې د امریکايي سرتېرو شمېر کم کړ.

په افغانستان کې د متحده ایالاتو په پینځلس ماموریت کې تر اوسه ۲ زره او دوه سوه امریکايي سرتېري وژل شوي دي.

XS
SM
MD
LG