د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۱:۰۲

د دهمزنګ د حملې په اړه څېړنیز کمېسیون جوړیږي


جمهوري ریاست وايي چې د کابل د خونړۍ حملې په اړه د تحقیقاتو د ځانګړي کمېسیون پر جوړولو کار روان دی.

د شنبې په ورځ د کابل په دهمزنګ سیمه کې د جنبش روشنايي د پلویانو پر لاریون انتحاري حملې وشوې چې لسګونه کسان یې مړه او ټپیان کړل.

د ولسمشر مرستیال ویاند شاه حسین مرتضوي پرون ازادي راډیو ته وویل، د دې حملې د څرنګوالي او عواملو په اړه د څېړنې لپاره د کمېسیون د غړو د ټاکلو چارې به نن بشپړې شي.

د ولسمشر مرستیال ویاند شاه حسین مرتضوي
د ولسمشر مرستیال ویاند شاه حسین مرتضوي

ښاغلي مرتضوي زیاته کړه:

"امنیتي ادارو ته ویل شوي چې خپل باصلاحیته استازي معرفي کړي. همدا راز د بشري حقونو خپلواک کمېسیون، معترضینو او د مرکزي سیمو سپین ږیرو ته هم ویل شوي چې خپل استازي معرفي کړي. تر دوشنبې ورځې پورې به معلومه شي چې کوم کسان په دې ترکیب کې شامل دي."

د جنبش روشنايي په مشرانو کې د احمد بهزاد ترڅنګ یو داودناجي دی چې د حکومت له خبرداري سره سره یې د دې د لاریون مشري وکړه.

ښاغلي ناجي له ازادي راډیو سره په خبرو کې د حکومت د تحقیقاتو په کمېسیون کې ګډون ته چمتووالی وښود.

ښاغلي ناجي په کمېسیون کې ګډون ته چمتووالی وښود.
ښاغلي ناجي په کمېسیون کې ګډون ته چمتووالی وښود.

ناجي وايي:

"موږ لومړیتوب د شهیدانو او ټپیانو کورنیو ته ورکوو چې په دې اړه تحقیقات د دوی د سترګو په وړاندې په شفافیت سره ترسره شي خو که دا کار د جنبش روشنايي د خلکو شورا ته راجع شي نو خپل استازي به ور معرفي کړي."

خو د جمهوري ریاست مرستیال ویاند ښاغلی مرتضوي وايي چې د جنبش روشنايي پر غړو سربېره د هزاره قوم ځیني نور استازي به هم په دې اړه په تحقیقاتو کې ګډون وکړي.

ښاغلی مرتضوي وايي:

"د روشنايي جنبش په مشرتابه کې زیات شمېر کسان وو چې د اسد د دوهمې له مظاهرو مخکې ووتل، لکه صادق مدبر، کریم خلیلي، عزیزالله شفق او نور وکیلان. په دې کمېسیون کې د هغو د استازو ګډون د دې قضیي د لا روښانه کیدو سره مرسته کولای شي."

د جنبش روشنايي یوه پلوي او په ولسي جرګه کې د بلخ د خلکو استازي مولوي عبدالرحمن رحماني چې د چارواکو له خبرداري وروسته یې په لاریون کې له ګډون څخه ډډه وکړه هم د تحقیقاتو له موظف کمېسیون سره د همکارۍ ډاډ ورکړ.

ولسمشر اشرف غني
ولسمشر اشرف غني

ښاغلي رحماني زیاته کړه:

"چمتو یم چې د جنبش روشنايي او خلکو په استازیتوب د دې ډول قضیو په اړه په تحقیقاتو کې مرسته وکړم چې دا دوه اړخونه لري- یو وړمه ورځنی پېښه او بل د دې ډول ملي قضیو حقیقت موندنه."

ولسمشر اشرف غني د شنبې په ورځ له دې پېښې سمدستي وروسته د لوی څارنوال په مشرۍ د تحقیقاتو لپاره د یوه کمېسیون د جوړېدو امر وکړ څو د پېښې په اړه هر اړخیز تحقیقات وکړي.

ښاغلي غني ژمنه وکړه چې ګرمو کسانو ته به که په حکومت کې دي او که له حکومته بهر سزا ورکړل شي.

XS
SM
MD
LG